ইলিশ মাছৰ সোৱাদ ল’বলৈ এতিয়া আৰু বাংলাদেশলৈ অপেক্ষা কৰিব নালাগে৷ কাৰণ অসমৰ জনসাধাৰণে শীঘ্ৰে সোৱাদ ল’ব পাৰিব এক নতুন মাছৰ, যাৰ সোৱাদ ইলিশৰ দৰেই৷ ‘যদি সকলো ঠিকে ঠাকে থাকে তেন্তে অসমে অচিৰেই আৰম্ভ কৰিব মিল্ক ফিছৰ উৎপাদন৷
ইয়াৰ বাবে কেন্দ্ৰীয় কৃষি আৰু কৃষক কল্যাণ মন্ত্ৰালয়ৰ ন’ডেল এজেন্সী হিচাপে কাম কৰা ইণ্ডিয়ান কাউন্সিল অৱ এগ্ৰিকালচাৰেল ৰিছাৰ্চৰ অধীনস্থ চেণ্ট্ৰেল ইন্ষ্টিটিউট অৱ ব্ৰেকিছৱাটাৰ একোৱাকালচাৰ, চমুকৈ চিআইবিএ-ই গৱেষণা আৰম্ভ কৰিছে৷’–এই মন্তব্য চিআইবিএৰ সঞ্চালক ড॰ কুলদীপ কে লালৰ৷ প্ৰেছ ইনফৰমেচন ব্যুৰ’ৰ উদ্যোগত তামিলনাডু ভ্ৰমণলৈ যোৱা সাংবাদিকৰ দলৰ সৈতে অনুষ্ঠিত এখন বৈঠকত চিআইবিএৰ সঞ্চালক ড॰ কুলদীপ কে লালে এইদৰে কয়৷ ড॰ লালে আৰু কয় যে গুৱাহাটী বিশ্ববিদ্যালয়ৰ সৈতে মিলি ইতিমধ্যে গৱেষণা চলি আছে আৰু অতি সোনকালে অসমে মিল্ক ফিছ উৎপাদন কৰিবলৈ গৈ আছে৷
তেওঁ আৰু কয় যে গৱেষণা প্ৰায় চূড়ান্ত পৰ্যায়ত আছে আৰু এতিয়া চিআইবিএ-য়ে যুৱ উদ্যোগীলৈ অপেক্ষা কৰিছে, যিসকলে উৎপাদন প্ৰক্ৰিয়াৰ পদক্ষেপ গ্ৰহণ কৰিব৷ মিল্ক ফিছৰ বিষয়ে অৱগত কৰি সঞ্চালকগৰাকীয়ে কয় যে মিল্ক ফিছৰ সোৱাদ প্ৰায় ইলিছ মাছৰ দৰেই৷ ড॰ লালে আৰু কয় যে অসমসহ সকলো ৰাজ্যতে মাছ উৎপাদন আন্তঃগাঁথনি বিকাশৰ প্ৰয়োজন আছে৷ অসম চৰকাৰৰ মীন বিভাগে বহিঃৰাজ্যৰ পৰা অহা মাছৰ ওপৰতে নিৰ্ভৰ কৰিবলগীয়া হয়৷ মাছৰ মূল্য নিৰ্ধাৰণৰ ক্ষেত্ৰত নিৰ্ধাৰিত কোনো নীতি-নিয়ম নাই৷
আনহাতে, অসমত মাছৰ খাদ্যৰ মিল নাই বুলি মন্তব্য কৰে চিআইবিএৰ সঞ্চালকে৷ তেওঁৰ মতে, মাছৰ উৎপাদনত খাদ্য প্ৰস্তুতি মিলৰ গুৰুত্বপূৰ্ণ ভূমিকা আছে৷ চিবাৰ বিষয়াসকলে অসমৰ সাংবাদিক দলটোক মাছৰ খাদ্য প্ৰস্তুতৰ মিল, মাছৰ পোনা, মিছা মাছৰ উৎপাদন প্ৰণালী, কেঁকোৰা উৎপাদন আদিৰ বিস্তাৰিত ব্যাখ্যা আগবঢ়ায়৷ ইয়াৰ উপৰি চেন্নাইৰ পৰা ৩০ কিঃমিঃ দক্ষিণে অৱস্থিত মটুকড্ডুত থকা উৎপাদন কেন্দ্ৰত আলংকাৰিক কেঁকোৰা উৎপাদন আৰু ব্যৱস্থাপ্ৰণালী স্বচক্ষে প্ৰত্যক্ষ কৰে সাংবাদিকৰ দলে৷
